男士護膚心得

男士護膚心得


由於前女友係美容師，兩年前開始注重自己皮膚，由最初求其洗下面，到呢家每月花一千幾百係skin care產品上，前前後後用過唔少牌品，仲同幾個牌子既Sales姐姐熟落咗添～叫做有少少心得可以同大家分享。

男仔皮膚厚過女仔，同埋出油會多啲，護膚品自然有分別，雖然係咁講， 但部份聲稱for men既產品其實同女士條line一樣...尤其係洗面產品 (Sales姐姐爆料！)
另外大部份男仔皮膚都屬於混合性，而唔係油性皮膚！千祈唔好以為有油就等如油性皮膚，頭先都講過，男仔油比較多，有油都好正常，而且好多時係因為缺水所以先出油，只要保濕做得好，自然會減少「油立立」嘅感覺。而真正油性皮膚係油得好誇張，長時間塊面反晒光，可以照到鏡先係油性皮膚。

洗面：
最基本嘅洗面，早晚一次，不過要留意男仔普偏比較鍾意乾爽，日常生活好多時都會走入廁所...用清水洗面～其實咁樣好快又會出油架，可以試下用紙巾輕輕抺下，真係頂唔通先用清水"過一過水"， 再用紙巾印乾佢。吸油紙我就冇乜點用，可能呢家skin care用得好所以比較少油。另外好多人話洗完面好乾代表啲洗面膏唔好，其實洗完面乾係好正常，所以要即刻用爽膚水同保濕，咁就無問題喇！
產品方面我用過Shiseido men，Biotherm Homme，Clinique Men同Ettusais Homme，感覺Clinique最乾淨，但Clinique好鬼臭頂唔順，而ettusais都幾乾淨，舊soap又平啲，不過每次都要落力捽都幾麻煩。(Shiseido men成條line都好廢下，所以下面我刪略唔講啦)

爽膚水：
洗完面就要用爽膚水，不過要先濕落棉花上再抹落面度，呢個步驟好多男仔都會怕麻煩，尤其係男仔有鬚根，會刮到成面棉花！建議各位去卓悅買盒LEED麗的棉，佢嘅質底好特別，唔會刮到成面棉花。
產品方面用過好幾隻牌子，最後用Biotherm女士隻Biososuce爽膚水，點解唔用men？men大部份都有酒精唔係人人受得，而且酒精收毛孔同控油呢招根本冇用！只會令乾既皮膚更加乾！反而女士既爽膚水更保濕又唔會過份滋潤，而且仲平啲添...
而有酒精既爽膚水，只有真正油性皮膚先適用，記住唔好亂用呀～

保濕：
3個基本step之中，保濕最重要！亦係男女護膚最大分別嘅地方，因為女士保濕產品對男士來講太過滋潤，會有「痴立立」感覺，所以男士追求保濕效果之餘，更加著重保濕產品嘅質底同吸收效果。
保濕不二之選Biotherm AQUAPOWER，雖然貴但好好用，夠保濕之餘又爽唔會有「痴立立」感覺！另外我又用過Clinique Men，無論M-lotion同M-Gel都用過，質底感覺麻麻，所以棄用。
有人介紹用Kiehl's facial fuel～平啲又好用，下次等我試下先，嘿～

控油：
原本以為油性皮膚先要用控油產品，但有次試用Clinique men既oil control之後就愛上咗佢，呢支oil control除咗控油仲有保濕效果，就算夏天塊面都可以保持大半日乾爽，推介！

磨沙：
深層潔面、磨沙，建議每個禮拜做一次，千祈唔好做得太密，用磨沙嘅時候亦唔好太用力同做太耐，如果唔係會整傷皮膚架！
產品方面我淨係用過Shiseido同Biotherm，相比之下當然Biotherm好好多啦...

其他：
Mask對男仔來講係幾麻煩，不過都建議大家每星期做一次保濕啦～Mask冇話專For男仔用，所以可以參考返啲姊妹嘅推介。
就保濕Mask來講，可以話係一分錢一分貨，推介Clinique Moisture Surge Facial Sheet Mask $375/6片，太貴用唔起...另外某雜誌做過比較，推介Origins Skin Rejuvenating Sheet Mask $380/6片，同樣貴到暈...

後話：
乜都係假！飲水對皮膚最重要，各位一定要勤飲水呀～當然睡眠休息都好緊要啦！另外DHC好耐之前用過無料到，Origins好可惜冇出男士line，FANCL無乜好感所以未試，而Clarins同Kiehi都好想試下，但對現有組合已經好滿意，所以暫時唔會試用住（送sample畀我另計，呵呵）。如果有乜錯漏各位可以留言指點下，謝謝啦～
來源:http://hk.myblog.yahoo.com/jw!6piQZlOLERlplBaArg19/article?mid=542